(2000-ci il; Kəkəl kəndi, Ağdaş rayonu) — Vətən müharibəsinin qazisi.
21 yaşlı Vüsal Mehdiyev Vətən müharibəsi qazisidir. Ağdaş rayonunun Kükəl kəndindən olan qazi müharibənin ilk günündən torpaqlarımızın azadlığı uğrunda şərəflə döyüşüb. Suqovuşan istiqamətində gedən ağır döyüşlərin birində yaralanaraq bir qolunu itirib. O, torpaqlarımızın işğaldan azad olunması zamanı döyüş tapşırıqlarını uğurla yerinə yetirdiyinə görə “Cəsur döyüşçü” medalı ilə təltif edilib.
Vüsal Mehdiyev Suqovuşandakı döyüşü belə xatırlayır: “Oktyabrın 1-i döyüşdən çıxmışdıq. Bizə bir az istirahət vermişdilər. Yemək yeyib yenidən döyüşə girəcəkdik ki, mərmi yaxınlığımıza düşdü. Səssiz gəldiyinə görə xəbərimiz olmamışdı, partlayanda xəbər tutduq. Yerə uzanmağa imkan tapmadıq. Bir anlıq hər yer toz-duman oldu. Bir də onu gördüm ki, qolum yoxdur. Yaxınlıqda bir leytenant vardı, gəlib qolumu sıxıb bağladı. Sonra iynə vurdular və Naftalana apardılar, əməliyyat olundum. Sonra isə Gəncə hospitalına köçürdülər”.
Qazi deyir ki, döyüşlərdə yaralanan və şəhid olan hərbçi yoldaşları da olub. Döyüş yoldaşını itirmək nə qədər ağır olsa da, onların qisasını aldıqca təskinlik tapıblar:
“Yanımızda qardaşlarımız yaralandılar, şəhid oldular. Hər dəfə düşməni məhv edəndə düşünürdük ki, onların qanı yerdə qalmadı. Düzdür, istəyərdik ki, Şuşanın qaytarılmasında da iştirak edək, amma qismət olmadı. Yenə də şükürlər olsun ki, biz o rayonları geri qaytardıq”.
Sağ qolu dirsəkdən yuxarı kəsilən qazi bütün sənədlərini toplayaraq əllik təyinatı ilə bağlı müraciət etdiyini deyir. Onun sözlərinə görə, hələ pensiya məbləğini almasa da, ona ikinci qrup əlillik təyin olunub. Qazinin gələcəklə bağlı çoxlu arzuları var. Əsas istəyi isə evini düzəltdirmək və ailə həyatı qurmaqdır.
